অসম আদিত্যৰ সাংবাদিক ৰূপম কাকতিৰ কাব্য গ্ৰন্থ উন্মোচন ।
তিনিচুকীয়া,২৬ নবেম্বৰঃ জাৰ্ণেলিষ্ট ইউনিয়ন অৱ আছামৰ ৰাজ্যিক কাৰ্যনিৰ্বাহক সভা এখন কালি তিনিচুকীয়া জিলাৰ ডিব্ৰু নৈৰ কাষৰ বনশ্ৰী ৰিৰ্জটত অনুষ্ঠিত হয় । দুপৰীয়া সংবাদ মাধ্যমত ডিজিটেল প্ৰযুক্তিৰ প্ৰভাৱ শীৰ্ষক এখন আলোচনা চক্ৰ অনুষ্ঠিত হয় ।এই আলোচনাত বক্তা হিচাবে উপস্থিত থাকে আই জে ইউৰ সভাপতি গীতাৰ্থ পাঠক আৰু জাৰ্ণেলিষ্ট ইউনিয়ন অৱ আছামৰ ৰাজ্যিক সভাপতি চেলিম চুলতানা আহমেদ ।জিলা সমিতিৰ সভাপতি অখিল চন্দ্ৰ বৰুৱা আৰু ৰাজ্যিক সমিতিৰ উপ সভাপতি ৰূপম কাকতিৰ সভাপতিত্বত অনুষ্ঠিত হোৱা আলোচনাত বিশিষ্ট অতিথি হিচাবে উপস্থিত থাকে অসম চৰকাৰৰ শ্ৰম মন্ত্ৰী সঞ্জয় কিশান,চাবুৱাৰ বিধায়ক পোণাকণ বৰুৱা,অৰুণাচল বিশ্ববিদ্যালয়ৰ উপাচাৰ্য ডি এচ হাৰনৱাল ।আলোচনাত আই জে ইউৰ সভাপতি গীতাৰ্থ পাঠক আৰু বিশিষ্ট ব্যক্তিসকলে সংবাদ মাধ্যমত ডিজিটেল প্ৰযুক্তিৰ প্ৰভাৱৰ বিভিন্ন দিশ উল্লেখ কৰে ।
বিধায়ক পোণাকণ বৰুৱাই অসম আদিত্যৰ সাংবাদিক ৰূপম কাকতিৰ কাব্য সংকলন ‘ববৰ্ণ ৰাতিৰ কবিতা’ উনোচন কৰে । কাব্য সংকলনখনত কবি গৰাকীয়ে লিখা আত্মকথা নিজা হাতৰ আখৰেৰে লিখাত বিধায়ক গৰাকীয়ে প্ৰশংসা কৰে । এই আলোচনাত বিশিষ্ট ব্যৱসায়ী তথা সমাজ সেৱক বিজয় জৈন,ওমপ্ৰকাশ কামদাৰো উপস্থিত থাকে ।বিয়লি ৰাজ্যিক কাৰ্যনিৰ্বাহক সভাখন অনুষ্ঠিত হয় ।
ৰাজ্যিক সভাপতি চেলিম চুলতানা আহমেদৰ পৌৰোহিত্যত অনুষ্ঠিত হোৱা সভাৰ উদেশ্য ব্যাখ্যা কৰে সাধাৰণ সম্পাদক ধনজিৎ দাসে ।সভাৰ আৰম্ভণীতে পৰিবেশ কৰ্মী নিৰন্ত গোঁহাইয়ে ডিব্ৰুচৈখোৱাত চোৰে জীৱ জন্তু হত্যা কৰা আৰু গভীৰ বনাঞ্চলৰ মূল্যবান গছ গছনি কাঠ চোৰে কাটি ধ্বংস কৰাৰ বিষয়ে সাংবাদিকসকলক অৱগত কৰে আৰু এই ক্ষেত্ৰত বন বিভাগৰ ভূমিকাকো সমালোচনা কৰে ।ৰাজ্যখনৰ বিভিন্ন জিলাৰ পৰা ৩২ গৰাকী সদস্য,বিষয়-ববীয়াই অংশগ্ৰহণ কৰা এই কাৰ্যনিৰ্বাহকত ৮টা প্ৰস্তাৱ গ্ৰহণ কৰে ।জুৱাৰ সদস্যসকলক জাৰ্ণেলিষ্ট ইউনিয়ন অৱ আছামৰ তিনিচুকীয়া জিলা সমিতিয়ে চেলেং চাদৰ,স্মাৰক,বেগ,ডাইৰী আৰু চাহ পাতৰ টোপোলা প্ৰদান কৰি আদৰণি জনায় ।